دیکھ! دامن نہ چھوڑنا میرا (غزل) از غضنفر

GNK URDU 22 April 2024

غزل

دیکھ ! دامن نہ چھوڑنا میرا
سن ! بھروسا نہ توڑنا میرا

کچھ بزرگوں کو بھی پسند آیا
سر سرِ راہ پھوڑنا میرا

خود مری آنکھ کو نہیں بھایا
پاوں اًس سمت موڑنا میرا

کچھ کو اچھا بھی تو لگا تھا بہت
گھر کی دہلیز چھوڑنا میرا

کتنا بھاری پڑا کلائی کو
ہاتھ اک دن مروڑنا میرا

ساری دنیا نے ان کو دیکھا ہے
استخواں تک چچوڑنا میرا

ورنہ دریا امنڈ پڑے گا پھر
خون سارا نچوڑنا میرا

یاد رکھنا کہ میں نہ جاگ پڑوں
جسم جب بھی جھنجھوڑنا میرا

تو بھی بستا ہے , بات یاد رہے
سر جو پتھر سے پھوڑنا میرا

پر یہ صورت تری نہ رہ پاۓ
ٹھیک ہے تن بھنبھوڑنا میرا

۔۔۔۔۔۔۔۔
غضنفر